Barazia gjinore është e drejtë themelore dhe faktor i rëndësishëm për rritje ekonomike, dhe zhvillim të qëndrueshëm shoqëror. Kushtetuta e Republikës së Kosovës garanton barazinë gjinore në të gjitha segmentet e jetës shoqërore, ekonomike, dhe politike. Përkushtimi për barazi gjinore thekson domosdoshmërinë për zhvillimin dhe zbatimin e politikave me perspektivë gjinore, përmes strategjive dhe programeve, kornizës ligjore, dhe ofrimin e të mirave dhe shërbimeve për të arritur barazi në mes të gjinive.
Korniza ligjore dhe profesionale siguron që barazia gjinore të jetë në qendër të proceseve transformuese në Kosovë, në kuadër të gjitha strukturave, institucioneve, politikave, procedurave, praktikave dhe programeve të qeverisë, akademisë, agjencive, shoqërisë civile, sektorit privat dhe komunitetit të donatorëve. Puna në barazinë gjinore shtrihet në tri drejtime strategjike, që përfshinë:
• Krijimin e mundësive të barabarta për të kontribuar dhe përfituar në /nga zhvillimi ekonomik, rritjen e gjithë përfshirjes dhe përmirësimin e mirëqenies sociale;
• Avancimin e barazisë gjinore, përmes arsimit dhe shëndetësisë cilësore, gjithë përfshirjes, dhe shfrytëzimit të kapaciteteve njerëzore si kontribues në zhvillimin e qëndrueshëm njerëzor dhe zhdukjen e pabarazive dhe stereotipeve gjinore; dhe
• Avancimin e realizimit të drejtave në vendimmarrje, paqe, siguri dhe drejtësi si garantues për arritje të barazisë gjinore
Agjencia për Barazi Gjinore, Zyra e Kryeministrit
